Ku wa Kabiri, tariki 13 Ukuboza 2022, Umuryango utari uwa Leta uharanira kubungabunga ibidukikije, guteza imbere ubuhinzi no kurwanya ubukene (APEFA), washyikirije inkunga y’amabati yo gusakara ubwiherero imiryango 150 yo mu mirenge 3 yo mu Karere ka Nyanza, Intara y’Amajyepfo, mu rwego rwo kugira ngo bakomeze kwita ku isuku mu buzima bwabo bwa buri munsi.
Iyi miryango yahawe iyi nkunga y’isakaro ry’ubwiherero, irimo; imiryango 60 yo mu murenge wa Kigoma, 60 yo mu murenge wa Muyira na 30 yo mu murenge wa Kibirizi.
Iki gikorwa cyabereye mu ‘Nteko y’abaturage’ yateraniye mu Murenge wa Kigoma, Akagari ka Butara, Umudugudu wa Kigufi, APEFA yari ihagarariwe na Kubwayezu Livingstone, Umuyobozi ushinze imiyoborere n’umutungo ndetse kitabiriwe na Visi Mayor ushinzwe imibereho myiza y’abaturage mu Karere ka Nyanza, Madamu Kayitesi Nadine ndetse n’Umunyamabanga Nshingwabikorwa w’Umurenge wa Kigoma, Mukantaganzwa Brigitte.
Umuyobozi ushinze imiyoborere n’umutungo muri APEFA, Kubwayezu Livingstone yatangaje ko bishimiye gutanga amabati yo gusakara ubwiherero ku baturage bari bakeneye ubufasha. Asaba abaturage ba Butara kwita ku isuku, kubungabunga ibidukikije no kurwanya ubukene bagamije iterambere ry’umuryango.
“Babigishije kugira isuku nizere ko bitaza kuba amasigaracyicaro, mugerageze tugire isuku, tujyanemo twubake ubwiherero, kuko burya hariya ni ahantu umuntu wese akenera kujya, niyo mpamvu ku bufatanye n’Akarere, twamenye ko hari abantu badafite ubushobozi bwo kubona ubwiherero, bityo turicara turavuga duti mu bushobozi buke dufite nk’Abanyarwanda reka turebe ko twabona isakaro kugira ngo dufashe ababashije kubona ubwiherero ariko bukaba budasakaye maze tubafashe basakare.”
Umuyobozi wungirije ushinzwe imibereho y’abaturage w’Akarere ka Nyanza, Madamu Kayitesi Nadine yatangiye ashimira umufatanyabikorwa APEFA kubw’iyi nkunga y’isakaro ku bwiherero ku baturage bafite ubushobozi buke. Yasabye abaturage ba Butara kugira isuku, baharanira kugira ubwiherero mu ngo zabo.
Ati “Ikibazo cy’ubwiherero ubundi twakabaye tutakikiganiraho ariko kiraduhangayikishije, nta muntu mukuru wakwiye kuba adafite aho yiherera mu rugo. Ni mureke dusubire ku isuku mu miryango, rero ni ukuvuga ngo baradusiga twinogereza, bakubite tubangura natwe.”
Mukamana Jacqueline, umubyeyi w’abana 3 utuye mu Murenge wa Kigoma, Akagari ka Butara, Umudugudu wa Kigufi, yagaragaje ko yishimiye iyi nkunga bahawe n’umuterankunga APEFA.
Ati “Nabyakiriye neza, ndishimye kugira ngo mbone ubwiherero busakaye, narimbufite ariko budasakaye none ndishimye kuko mbonye isakaro.”
Minani Noel, umwe mu bahawe iyi nkunga utuye mu Murenge wa Kigoma, Akagari ka Butara, nawe avuga ko iyi nkunga abonye izamufasha gukemura ikibazo cyo kutagira isakaro ry’ubwiherero.
Ati “Bangiriye neza cyane kuko urabona ndasa naho nkiri muto cyane, nafi mfite ubwiherero ariko ntarabona isakaro, none ubu biramfashije, natekerezaga kuzarigura kera ariko ubu ngiye gukataza, buriya nzashaka ibindi mu mwanya w’isakaro.”
Umuryango wa APEFA ukaba yatanze iyi nkunga ku baturage, ishyira mu bikorwa amasezerano y’imikoranire mu iterambere n’ibereho myiza y’abaturage, yagiranye n’Ubuyobozi bw’Akarere ka Nyanza, yashyizweho umukono ku ya 8 Gashyantare 2022.
ANDI MAFOTO:
